Հարուցվել է քրեական գործ՝ սուտ ցուցմունք տալու համար
ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ՝ փաստաթղթեր կեղծելու և սուտ ցուցմունք տալու դեպքի առթիվ:
Կառավարությանն առընթեր անշարժ գույքի կադաստրի պետական կոմիտեից ստացված նյութերի ուսումնասիրությամբ պարզվել է, որ «Բագրատունյաց 13» համատիրության նախագահ Ի. Զաքարյանը, խախտելով «Բազմաբնակարան շենքի կառավարման մասին» ՀՀ օրենքի 11-րդ հոդվածի 7-րդ կետի «եե ենթակետի, 8-րդ և 12-րդ կետերի պահանջները, առանց բնակիչների համաձայնությունն ստանալու նույն համատիրության հսկիչ Գ. Բոդուրյանի հետ նախնական համաձայնությամբ 2007թ. օգոստոսի 6-ին կազմել, ստորագրություններով և համատիրության կնիքով հաստատել են ակնհայտ կեղծ փաստաթուղթ, որի հիման վրա Չեխովի 15 շենքի ընդհանուր բաժնային սեփականությունից 68 քմ մակերեսով նկուղային տարածքն անհատույց, սեփականության իրավունքով հատկացվել է հիշյալ շենքի բնակիչ Ա. Մկրտչյանին:
Բացի այդ` Ի. Զաքարյանը և Ա. Մկրտչյանը վերջինիս սեփականության իրավունքը ճանաչելու պահանջի մասին դիմումի հիման վրա` Շենգավիթ համայնքի ընդհանուր իրավասության առաջին ատյանի դատարանում քաղաքացիական գործի քննության ընթացքում սուտ ցուցմունքներ են տվել այն մասին, թե իբր 2007թ. օգոստոսի 6-ին տեղի է ունեցել շենքի սեփականատերերի ընդհանուր ժողով, որի որոշման միաձայն որոշմամբ վերոնշյալ նկուղային տարածքը սեփականության իրավունքով հատկացվել է Ա. Մկրտչյանին: Վերջինս նաև կեղծ արձանագրությունը ներկայացրել է դատարան: Դատարանը, հիմք ընդունելով սուտ ցուցմունքներն ու կեղծ արձանագրությունը, 2009թ. մայիս ամսին վճիռ է կայացրել դիմումը բավարարելու վերաբերյալ:
Փաստի առթիվ գլխավոր դատախազության պետական շահերի վարչությունում հարուցվել է քրեական գործ՝ ՀՀ քրեական օրենսգրքի 325-րդ հոդվածի 1-ին, 2-րդ մասերի և 338-րդ հոդվածի 1-ին մասի հատկանիշներով:
Քրեական գործն ուղարկվել է ոստիկանություն` նախաքննությունն իրականցնելու համար:
Այս մասին տեղեկացնում են ՀՀ դատախազությունից։