«ԱՊՐԻԼԻ 24-ՈՎ ՄԵԶ ՉԵՆ ՎԱԽԵՑՆԻ»
 Թուրքիայի արտգործնախարար Ահմեդ Դավութօղլուն, անդրադառնալով ԱՄՆ Կոնգրեսի ներկայացուցիչների պալատի արտաքին հարաբերությունների հանձնաժողովում Հայոց ցեղասպանությունը դատապարտող բանաձևի քննարկմանը, ընդգծել է, որ այդ քայլը պատահական չէ. այս մասին տեղեկացնում է «Հյուրիեթը»: Մյունխենից վերադարձի ճանապարհին ինքնաթիռում պատասխանելով լրագրողների հարցերին` Դավութօղլուն ասել է, որ վերջին շաբաթների իրադարձությունները` ՀՀ ՍԴ որոշումը, Սոչիի եռակողմ հանդիպման ժամանակ Սերժ Սարգսյանի ապակառուցողական ելույթը, ի վերջո ԱՄՆ Կոնգրեսի նախագիծը, ցույց են տալիս, որ ամեն ինչ հայերի կողմից նախապես ծրագրված է եղել: «Իրադարձությունների շարունակական շղթան պատահական չէ: Ինչու՞ Կոնգրեսի նախագիծը հիմա հայտնվեց: Թող չակնկալեն, որ մենք կվավերացնենք արձանագրությունները` ենթարկվելով ապրիլի 24-ի ճնշմանը: Կոնգրեսի որոշումը չի համապատասխանում ո՛չ ԱՄՆ-ի, ո՛չ Թուրքիայի, ո՛չ Հայաստանի շահերին և կարող է փակուղի տանել ԱՄՆ-ի հետ մեր հարաբերությունները, ինչպես նաև Հայաստան-Թուրքիա հարաբերությունների բարելավման գործընթացը: Վաշինգտոնը պետք է ավելի զգույշ անդրադառնա մեզ համար խիստ զգայուն հարցերին»,- ասել է Թուրքիայի արտգործնախարարը: |
