«Իմիտացիա է տեղծվում, որ իբրև գործ է արվում, սահմանադրական նորմը փորձ է արվում կիրառել մեխանիկորեն, չեմ բացառում, նաև որ անձինք կան, որ այդ լծակներով փորձում են քաղաքական հիմքեր ստեղծել, հատկապես 2012 թվականի ընտրությունների նախաշեմին` լրացուցիչ լծակներ և հնարավորություններ տալով համայանքների ղեկավարներին, հատկապես նրանց, ովքեր գրեթե միշտ մասնակցում են ընտրակեղծիքների ձևավորմանը՝ նոր ճնշման լծակներ կիրառել անհնազանդ ընտրողների նկատմամբ»:

Դաշնակցություն խորհրդարանական խմբակցության ներկայացուցիչ Արծվիկ Մինասյանը նման տեսակետ հայտնեց վերջերս ՀՀ կառավարության կողմից ԱԺ ներկայացված հարկային փաթեթի վերաբերյալ, որով առաջարկվում է ավելացնել տեղական հարկերը` ելնելով ՀՀ Սահմանադրությամբ ամրագրված նորմի պահանջի կատարումից, ըստ որի համայնքներն իրավասու են սահմանել տեղական հարկերը։ Այն բուռն քննարկումների առիթ է դարձել ոչ միայն ընդդիմադիր խմբակցությունների, այլև հենց կոալիցիան ներկայացնող քաղաքական ուժերի մոտ: «Ուրբաթ» ակումբում հրավիրված ասուլիսի ընթացքում ԱԺ «Դաշնակցություն» խմբակցության ներկայացուցիչ Արծվիկ Մինասյանը նշեց, որ իրենց խմբակցությունը նույնպես ակտիվ հակադարձում է ցուցաբերում, մասնավորապես փաթեթով առաջարկվող 10 հարկատեսակներին, որոնցից հողի հարկը և գույքի հարկը ներկայում գործում է, սակայն առաջարկվում է, որպեսզի դրանք դառնան համայնքի պարտադիր լիազորություն։ Ավելացվում է ևս 8 հարկատեսակ, որոնք, ըստ Արծվիկ Մինասյանի, միայն անվանումներով են ներկայացվում. չկա որևէ հստակ ձևակերպում կապված գործնական կիրառության հետ: «Մեր առարկությունները բխում են 4 հիմնական ուղղություններից` տնտեսական հիմնավորումներ, սոցիալական հետևանքներ, տարածքային համաչափ զարգացման համատեքստում ազգաբնակչության տիրապետող ռեսուրսների ճիշտ օգտագործում և քաղաքական ուղվածություն: Մեր խորին համոզմամբ` այն տեսքով, ինչ տեսքով որ ներկայացված է այս նախագիծը, չի կարող քաղաքական ենթատեքստ չունենալ: Այս հարկային փոփոխությունները բերելու են սեփականության նոր վերաբաշխման հնարավորության ընձեռման, մյուս կողմից ավելացնելու են անբարեխիղճ համայնքի ղեկավարների դիրքերը և թուլացնելու են բարեխիղճներինը»,- ավելացրեց Դաշնակցություն խորհրդարանական խմբակցության ներկայացուցիչը:

Արծվիկ Մինասյանը նշում է, որ խմբակցության պահանջն է` ներկայացված փաթեթը լուրջ քննարկման առարկա դարձնել և առաջին հերթին՝ հայեցակարգի մակարդակով: «Հայեցակարգ, որտեղ պետք է պատասխան տրվի մի շարք հարցադրումների, սկսած նրանից, թե այս հարկատեսակներն ինչպիսի՞ հետևանքեր են ունենալու, ինչո՞վ են արդարացվում դրանց ներմուծումը Հայաստանի Հանրապետություն, որքանով են սրանք համապատասխանում հարկ հասկացությանը, այլ ոչ թե տուրքերի մակարդակում վերածվում հարկերի»,- հարցադրեց պատգամավորը օրինակ բերելով «վաճառքի հարկ» հասկացությունը, որը ոչ մի կետով չի բացատրվում, թե ինչ է իրենից ներկայացնում:

Արծվիկ Մինասյանը տեղեկացրեց, որ հարկատեսակներից շատերը վերցված են Ադրբեջանի կառավարման օրինակից: «Օրինակ, ինչո՞ւ չպետք է քննարկվի աղբահանման հարկը, որ առաջարկում է Վահան Հովհաննիսյանը: Օգտագործումից հետո յուրաքանչյուր ապրանք վերածվում է աղբի: Ապրանքների գների չնչին բարձրացումը կտա այն ռեսուրսը, որ կարող ենք տրամադրել մարդկանց, ովքեր հանձ կառնեն այդ աղբի դուրս հանումը, վերամշակումը: Մենք չենք ասում, որ մեր առաջարկներն ամենաճիշտ են, դրա համար էլ մենք քննարկումների կողմնակից ենք»:

Հարկային փաթեթում ներկայացված փոփոխությունների շուրջ դեմ են արտահայտվել «Ժառանգությունը», ԲՀԿ-ն, «Օրինաց երկիրը»: «Ազգային ժողովի նախագահի կողմից արված առաջարկություններն էլ ցույց տվեցին, որ Հանրապետական խմբակցության մի զգալի հատված, այդ թվում և ԱԺ նախագահը, համկարծիք չէ այս տարբերակով օրենքի ընդունմանը: Համամիտ եմ նաև Հովիկ Աբրահամյանի առաջարկին` «Հարգարժան պատգամավորնե՛ր, կարդացեք օրենքներ», որովհետև պատգամավորների մի ստվար հատված ոչ միայն պարզապես չի ծանոթանում օրինագծերին, այլև կարող է մոտակա 50 տարիների ընթացքում նման ցանկություն չարտահայտել»,- հավելեց Արծվիկ Մինասյանը: