Հեռուստատեսության և ռադիոյի ազգային հանձնաժողովի կողմից Էրոտիկ բնույթի հեռուստահաղորդումների, սարսափ և ակնհայտ բռնություն պարունակող ֆիլմերի, ինչպես նաև անչափահասների առողջության, մտավոր և ֆիզիկական զարգացման, դաստիարակության վրա հնարավոր բացասական ազդեցություն ունեցող հաղորդումների որոշման չափորոշիչներ սահմանելու նախագծի մասին այսօր «Հայելի» ակումբում բանավիճում էին Հեռուստատեսության և ռադիոյի ազգային հանձնաժողովի փոխնախագահ Ժիրայր Դադասյանը և «Սեբաստիա» կրթահամալիրի տնօրեն Աշոտ Բլեյանը:

Ժիրայր Դադասյանը ներկայացրեց նախագծի ենթակետերը, որոնց առկայությամբ հաղորդումներն ու ֆիլմերը hայկական հեռուստաեթերում կլինեն կեսգիշերից հետո: Դրանք Էրոտիկ բնույթի կամ էրոտիկ դրվագներ պարունակող հեռուստառադիոհաղորդումներն ու ֆիլմերն են, որոնք կպատկերեն տղամարդու և (կամ) կնոջ սեռական օրգաններ, սեռական գործողության և (կամ) դրա նմանակում, ձայնային եղանակով սեռական գործողության ոչ մանրամասնեցված նկարագրություն: Բացառություն կկազմեն այն դեպքերը, երբ ցուցադրումը որպես դրվագ նպաստում է ստեղծագործության գեղարվեստական գաղափարական մտահղացման իրականացմանը և ապահովում է բովանդակային ամբողջականությունը: Սարսափ և ակնհայտ բռնություն պարունակող ֆիլմերի չափորոշիչներն են. արնախում հրեշների, գենետիկ մուտանտների, այլմոլորակայինների, կենդանի մեռյալների, մարդասպանների, մահաբեր աղանդների, սատանայական կամ դժոխային արարածների, մոլագարների, գերբնական եր¨ույթների ցուցադրումը, որոնք պարբերաբար հայտնվում են անսպասելի և խաղաղ իրավիճակներում, ինչպես նաև բնական աղետների չափազանցված պատկերումը, որոնք առաջացնում են սարսափի, վախի, տագնապի, անելանելիության, սոսկումի զգացողություններ և լրացուցիչ դիսթրեսս, մազոխիզմի, սադիզմի, առանձնակի դաժանությամբ մարդկանց, ինչպես նաև կենդանիների խոշտանգումների, կտտանքների ենթարկելու, խոշտանգված մարմինների մանրամասների չարդարացված պատկերումը: Անչափահասների առողջության, մտավոր և ֆիզիկական զարգացման, դաստիարակության վրա հնարավոր բացաuական ազդեցություն ունեցող հաղորդումների որոշման չափորոշիչներ են. հոգևոր, մշակութային արժեքների, ազգի երախտավորների նսեմացումը և վարկաբեկումը, պատմական իրողությունների և ներկա իրականության խեղաթյուրված, ոչ համարժեք ներկայացումը, բարոյականության նորմերի ժխտումը, մարդկային արժանապատվության նսեմացումը, անբարո ապրելակերպի քարոզը, ծնողների և դաստիարակների հեղինակազրկումը, ֆիզիկական և հոգեկան արատներ ունեցող անձանց նմանակումը և ծաղրումը, օրինազանցության, հանցագործ կենսակերպի քարոզը, հանցագործների հերոսացումը և ռոմանտիզացիան, թմրամոլներին և հարբեցողներին նմանակելը, գռեհկաբանությունը և հայհոյախոսությունը:

Ըստ Ժիրայր Դադասյանի` նախատեսված է, որ եթե հետագայում որևէ հեռուստաընկերություն խախտի օրենքը, ապա երկու անգամ նկատողություն ստանալուց հետո կզրկվի արտոնագրից:

Այս ամենը, ըստ էության, վատ բան չէ: Եթե իհարկե կիրառվի: Աշոտ Բլեյանը չափորոշիչները համարեց դեկորատիվ փոփոխություններ` դիտարկում անելով, որ դրանք կգործեն ոչ օբյեկտիվորեն և հավասար չեն լինի բոլոր հեռուստաընկերությունների համար:

Աշոտ Բլեյանը չի հավատում. «Նման հերթական, ոտքի վրա արված, ոչ իրավական, սահմանափակումներով նախագիծը ոչ միայն չի անցնի, այլև կշեղվենք իրական ճանապարհից: Սիրելիներս, իրական ճանապարհը կյանքը փոխելն է: Այս կյանքը փոխել` նշանակում է մեր հիմնարար իրավունքների ամրագրումը, այսինքն` լրագրողը, հեռուստաընկերությունը լինեն ազատ և պաշտպանված, ու տաղանդավոր անձը կարողանա գործել»,- տեսակետ արտահայտեց Աշոտ Բլեյանը` վստահեցնելով, որ նախագիծը տանելու է առանձին անհատների և իրավանաբանական անձանց ազատությունների սահմանափակմանը:

-Ինչո՞ւ եք ուզում լայն հասարակությանը զբաղեցնել այսպիսի ոչ լուրջ, ոչ պրոֆեսիոնալ, ոչ իրավական քննարկումներով,- հարց ուղղեց Բլեյանը:

-Բոլոր այն միությունները, հ/կ-ները, որոնք աշխատել են նախագծի վրա կհիասթափվեն կամ իրենց արածից, կամ Ձեր ասածից,- պատասխանեց Դադասյանը:

- Հասկացությունները լինում են հանրահայտ և օրենքով սահմանված: Ասե’ք, «ազգի երախտավորը» հանրահա՞յտ հասկացություն է: Մի հատ ազգի երախտավորների ցուցակ տվեք: Տարիներ առաջ ազգի երախտավոր էր Սասուն Միքայելյանը, ով հիմա հանցագործ է համարվում... Հիմա Նիկոլ Փաշինյանը ազգի երախտավո՞ր է, թե՞ չէ, Բլեյան Աշոտը ազգի երախտավո՞ր է, թե՞ չէ

-Ոչ, երախտավոր չէ, իմ կարծիքով հանցագործ է:

-Ուրեմն, Ժիրայր, հանցագործը դու ես:

-Ես Ձեզ չեմ վիրավորել:

- Նիկոլ Փաշինյանն իմ եղբայրն է: Նիկոլ Փաշինյանին հանցագործ համարողը հանցագործ է:

-Ոչ, այդպես չէ:

-Տեսա՞ք, տեսա՞ք, այս ազատ լրագրական լսարանում:

-Մենք այս թեմայով չենք եկել,- հիշեցրեց Ժիրայր Դադասյանը:

-Այս թեմայով ենք եկել...