- Պարոն Համազասպյան, եթե հնարավոր է կարճ՝ խնդրում ենք մեզ եւ ընթերցողին ներկայացրեք՝ ի՞նչ է արեւային էներգիան:

- Արեւային էներգիան մարդկությանը Աստված տվել՝ չի խնայել: Հիմա խնդիրն այն է, թե ինչպես կարելի է այն օգտագործել: Օգտագործման տարբեր ձեւեր կան` կարելի է արեւից ստանալ հոսանք, կարելի է արեւի էներգիան հավաքել մի կետի վրա եւ ստանալ  մինչեւ 5.5 հազար ջերմաստիճան:  Բայց մարդու կենցաղում պետք է ընդամենը ջուր տաքացնել եւ կերակուր պատրաստել, որի նպատակով մենք պատրաստել ենք TVH արեւային սարքերը, որոնք օրիգինալ են: Այսօր  պատրաստ ենք տեղական արտադրություն կազմակերպել` 3000 աշխատատեղ  խոստանում ենք ունենալ: Ինչպես համակարգիչներն այսօր կան յուրաքանչյուրի ընտանիքում, ուզում ենք, որ յուրաքաչյուր ընտանիք ունենա անհատական արեւային հելիո համակարգը: Երբ բոլոր բնակարանները կունենան բավարար չափի սարքեր, համարենք, որ Հայաստանն արդեն հելիոֆիկացված է:

- Հայաստանում ի՞նչ կիրառություն ունի այն: Որքանով մեզ հայտնի է՝ առաջինը նման սարք տեղադրել է Հայաստանում ՄԱԿ-ի գրասենյակը:

- Փորձնական, հետազոտական աշխատանքներ են տարվում:  ՄԱԿ-ն առանձին աշխատանք է տանում: Մենք խնդիր չունենք համագործակցության, պարզապես ցանկանում ենք տեղական արտադրություն սկսել Հայաստանում, Ղարաբաղում եւ արտահանել այլ երկրներ: Հիմա բանակցում ենք Ղազախստանի Թուրքմենստանի հետ:

- Քանի՞ տոկոսով արեւային էներգիան կփոխարինի ատոմային էներգիային:

- Մարդը, անհատական սեկտորը կենցաղում օգտագործում է հետեւյալ թվերը` ստացված էներգիայի գրեթե 75 տոկոսը գնում է տների ջեռուցման համար, 12 տոկոսը` ջերմային էներգիայի ձեւով գնում է  կերակուրի պատրաստման, 15 տոկոսը` լողանալու,  լվացքի, իսկ 3 տոկոսը՝ էլեկտրական էներգիայի, հոսանքի ձեւով: Հիմա այդ 3 տոկոսը կարելի է ստանալ սովորական ձեւով, կարելի է ստանալ նաեւ արեւային էներգիայի եղանակով, բայց մենք հիմնական շեշտը դնում ենք արեւից ջերմային էներգիա ստանալու վրա, որպեսզի այնքան էներգիա ստացվի, որ կարողանա ջերմային բոլոր խնդիրները լուծել:

- Պետությանը որքա՞ն գումար է հարկավոր՝ Հայաստանում համակարգն ամբողջովին կիրառելու համար:

- Մենք վաղուց արդեն գումար չենք սպասում, պետությունը գումար չունի, պետությունն ունի միայն պարտքեր եւ մենք պետությունից խնդրում ենք միայն, որ գոնե այդ պարտքերը մեր շալակը չդնեն: Ուզում ենք, որ պետությունն ընդունի մոտավորապես այն կարգավիճակը, ինչ Հոլանդիան է նախատեսել արեւային տեխնիկայի զարգացման համար` վարկերի տրամադրում եւ այլն: Այդ երկրում շատ մեծ առավելություն է տրված ընկերություններին, մարդկանց, որոնք զբաղվում են այլընտրանքային էլեկտրաէներգիայով: Եթե մեր կառավարությունը գոնե օրենք ընդունի, որը կնույնացնի հարկային համակարգը Հոլանդիայի հարկային համակարգի հետ… Ի դեպ մենք կվճարենք այն գումարները, որ կստանանք շահույթից:

- Նշեցիք, որ չեք սպասում ֆինանսավորման հարցում պետության աջակցությանը, այդ դեպքում, ֆինանսական ի՞նչ հիմքով եք պատրաստվում իրագործել ծրագիրը:

- Պետությունից մեր հանգուցյալ ակադեմիկոս Պարիս Հերունին միշտ սխալմամբ գումար ուզում էր, իսկ նրանք էլ չէին տալիս: Այսօր արդեն հետաքրքրությունն այնքան շատ է, որ մենք կվաճառենք,  կամաց-կամաց կարտադրենք, բայց պետք է նորմալ պայմաններ լինել, հարկային, որ արտասահմանյան ներդրողները կարողանան ներդրումներ անել:

- Իսկ ինչով չի գրավում այլընտրանքային էներգիայի աղբյուրը իշխանություններին, պետությանը:

- Իշխանությունները գազ են  վաճառում, հոսանք են վաճառում: Իրենց շուկայի մեջ մտնում է մի նոր բնագավառ, որը մոտ 60 տոկոսով կպակասեցնի միայն գազի ծախսը:

- Արեւային էներգիա ստանալու համար ունե՞նք մենք այդ գիտական ներուժը:

- Տեխնիկապես եւ տեխնոլոգիապես հնարավորությաւններ կան, սակայն կազմակերպչական առումով խնդիրներ ունենք: Նախապես հաշվարկված է` մեկ տարվա ծրագիր է` ամբողջ Հայաստանի համար:

- Ի՞նչ կարժենա արեւային էներգիան քաղաքացու համար:

- Ծրագիրը նախատեսված է դեռ գյուղերի համար: Պետք է մի ոլորտ, որը աշխատատեղ կապահովի. հիմքում ունենալով նաեւ այս նպատակը՝ վերցրել ենք գյուղական բնակելի տարածքները: Արեւային ջերմաէներգիայի մեկ կիլովատանոց սարքը  մոտավորապես 100-120 դոլարի սահմաններում կլինի: Եթե մարդը գնում է 5 կիլովատանոց սարք, կվճարի 600 դոլար եւ սարքը կաշխատի մեկ տարի՝ իր ինքնարժեքը կփակի,  եւ 49 տարի էլ կշարունակի անխափան աշխատել: Քաղաքում կարելի է օգտագործել դպրոցների, առանձնատների  ջեռուցման համար:

- Որքանով է անվտանգ  արեւային էներգիան եւ ինչ խնդիրներ կարող է առաջացնել:

- Միակ անվտանգ էներգիայի աղբյուրն է, եթե համեմատենք, ապա` գազից տներ են պայթում, մարդիկ թունավորվում են: Նավթն իր թերություններն ունի: Արեւից ոչ մի վտանգ չկա: Անվտանգ եւ շատ կիրառելի աղբյուր է:

- Կարծիք կա, որ արեւային էներգիայի օգտագործումը կխոչընդոտի ատոմակայանի գործունեությանը:

- Դա թյուր կարծիք է: Ատոմակայնի լավագույն սպառողը կարող է այն գործարանը լինել, որ կարտադրի արեւային սարքեր: Այնպես, որ ատոմակայանի հոսանքը ոչ թե տուն տաքացնելու համար է, այլ՝ գործարանների աշխատանքի:

- Արեւային էներգիայի գործածությունը կենցաղային եւ սոցիալական ի՞նչ խնդիրներ կարող է լուծել:

- Լուծում է մի շատ կարեւոր կենցաղային խնդիր` մարդը դառնում է անկախ՝ գազ եւ էներգիա մատակարարողների կամայականություններից: Աստծո արեւն ինքը վերցնում` օգտագործում է:

Զրուցեց

ԱՆԱՀԻՏ ԱՍԱՏՐՅԱՆԸ